Çin Sədri Si Cinpin, 7 il ərzində ilk dəfə olaraq Hindistana səfər edib. Səfər zamanı o, təyyarədən enərkən qırmızı xalça ilə qarşılanıb və ənənəvi Hindistan rəqslərini ifa edən qadınlar tərəfindən salamlanıb. Çin Xarici İşlər Nazirliyinin sözçüsü bildirib ki, şənbə günü axşam planlaşdırılan Si-Modi görüşü, son üç ildəki üçüncü görüşləri olacaq. Sözçü əlavə edib ki, Çin Hindistanla əməkdaşlıq etməyə, ikitərəfli münasibətlərə strateji və uzunmüddətli yanaşmağa, fikir ayrılıqlarını düzgün idarə etməyə və “yaxşı qonşu və dost, eləcə də qarşılıqlı dəstək göstərən tərəfdaşlar” olmağa hazırdır. Səfərin əsas məqsədi Yeni Dehlidə keçirilən BRICS liderlərinin sammitində iştirak etməkdir. BRICS-ə Braziliya, Rusiya, Hindistan, Çin və Cənubi Afrika, eləcə də Misir, Efiopiya, İndoneziya, İran və Birləşmiş Ərəb Əmirlikləri daxildir. Qeyd etmək lazımdır ki, Si Cinpinin səfəri, 2020-ci ildə Himalay sərhədində baş vermiş silahlı toqquşmadan sonra daha da mürəkkəbləşən Çin-Hindistan münasibətlərinin bərpası fonunda baş tutur. Bu toqquşma nəticəsində 20 hindistanlı və 4 çinli hərbçi həlak olmuşdu.