ABŞ Konqresinin üzvü Abraham Hamadeh bildirib ki, Azərbaycan və Ermənistan arasında sülh prosesi gözləniləndən daha sürətlə irəliləyir. O, yekun sülh sazişinin ABŞ Prezidenti Donald Trampın hazırkı prezidentlik müddəti başa çatmazdan xeyli əvvəl əldə oluna biləcəyini vurğulayıb.

Hamadeh, həmçinin, hər iki tərəfin Cənubi Qafqazda sülh və rifahı təmin etməkdə qərarlı olduğunu qeyd edib. O, ABŞ-ın prosesdə davamlı iştirakının və Bakı ilə İrəvan arasında əlaqələri gücləndirə biləcək TRIPP layihəsinin həyata keçirilməsinin vacibliyini vurğulayıb.

TRIPP layihəsi, Azərbaycanı Naxçıvan eksklavı ilə Ermənistan ərazisindən keçməklə birləşdirəcək. Marşrut boyunca dəmir və avtomobil yollarının, mümkün neft və qaz kəmərlərinin, fiber-optik rabitə və elektrik enerjisi infrastrukturlarının yaradılması nəzərdə tutulur.

Hamadeh, həmçinin, ABŞ-ın bölgədəki iştirakının yalnız Tramp administrasiyasının dövrü ilə məhdudlaşmayacağını, uzunmüddətli olacağını düşünür. O, həm Bakıda, həm də İrəvanda proseslərin çox rəvan getdiyini və hər iki tərəfin Cənubi Qafqazın sülh və rifahını təmin etməkdə qərarlı olduğunu bildirib.